Proverbs 22

1Ibizo elihle liyathandeka kulenotho enengi; ukuhlonitshwa kungcono kulesiwula kumbe igolide.

2Abanothileyo labayanga bayafanana ngalokhu: uJehova unguMenzi wabo bonke.

3Umuntu olengqondo uthi ebona ingozi acatshe, kodwa isithutha siyaphikelela singena enkathazweni.

4Ukuzithoba lokwesaba uJehova kuletha inotho lodumo lokuphila.

5Endleleni yababi kugcwele ameva lemjibila, kodwa onanzelela umphefumulo wakhe unqenqela khatshana.

6Fundisa umntwana indlela amele ahambe ngayo, kuzakuthi esemdala kayikuphambuka kuyo.

7Abanothileyo babusa abayanga, lalowo owebolekayo uyisichaka salowo omebolekayo.

8Lowo ohlanyele ububi uvuna ukuhlupheka, njalo uswazi lolaka lwakhe luzakwephulwa.

9Umuntu ophanayo uzabusiswa, ngokuba wabela abayanga ukudla kwakhe.

10Xotsha isedeleli, lenkani ihle iphume; ukuxabana lokuthukana kuyaphela.

11Othanda inhliziyo ehlanzekileyo, onkulumo yakhe ipholile uzakuba ngumngane wombusi.

12Amehlo kaJehova ayaluvikela ulwazi kodwa uyawadiliza amazwi abangathembekanga.

13Ivila lithi, “Kulesilo phandle!” kumbe lithi, “Ngizabulawa ezindleleni!”

14Umlomo wesifebekazi unjengomgodi otshonayo; lowo othukwe nguJehova uzawobokela kuwo.

15Ubuthutha bubotshelwe enhliziyweni yomntwana, kodwa uswazi lokuqondisa luzabuxotshela khatshana.

16Lowo ocindezela abayanga ukuze anothe ngabo, lalowo oncenga abanothileyo ngezipho – bonke bacina sebe ngabayanga.

Amazwi Ezihlakaniphi

 17Lalela uzwe amazwi ezihlakaniphi; nikela inhliziyo yakho ezifundweni zami,

18ngoba kuyathokozisa nxa uzigcina enhliziyweni yakho, uzitsho kalula ngezindebe zakho.

19Ukuze ithemba lakho lihlale kuJehova, yikho ngikufundisa lamuhla wena ngokwakho.

20Kangikulobelanga yini izitsho ezingamatshumi amathathu, izitsho zokweluleka lolwazi,

21ezikufundisa amazwi eqiniso athembekileyo, ukuze ukwazi ukupha izimpendulo ezilesisindo kulowo okuthumileyo na?

22Ungagegeleli abayanga ngoba bengabayanga njalo ungaphoseli abaswelayo entolongweni,

23ngokuba uJehova uzakuba ngummeli wabo abahlukuluze labo ababahlukuluzayo.

24Ungabi ngumngane womuntu ololaka, ungahambi lomuntu ozonda masinyane,

25funa ufunde izindlela zakhe uzingenise emjibileni.

26Ungabi ngumuntu ophanga ukwenza izithembiso kumbe onika isibambiso ngezikwelede;

27ungayiswela inhlawulo uzakwemukwa noma ngumbheda wakho olala kuwo.

28Ungasusi ilitshe lakudala elomngcele elabekwa ngokhokho bakho.

29Uyambona umuntu oyingcitshi emsebenzini wakhe na? Uzasebenzela amakhosi; akayikusebenzela abantukazana.
Copyright information for NdeIBE